L’Academia Aragonesa de la Lengua recibió lo Premio “Franja: cultura i territori 2025”
L’Institut d’Estudis del Baix Cinca, centro colaborador de l’Instituto de Estudios Altoaragoneses, va celebrar lo pasau sabado 21 de febrero en Vilella de Cinca la gala anual d'a entidat. L'acto se fació en o local social d'a localidat, coincidindo con a celebración d'o día d'a Lengua Materna, y estió adedicau a la memoria de l'historiador fragatino Joaquín Salleras.
En o transcurso d'a gala se entregoron los premios correspondients a l'anyo 2025, y tamién se dio a conoixer lo prochecto mereixedor d'a beca d'investigación IEBC-IEA.
Lo premio "Franja: cultura i territori 2025", atorgau per Iniciativa Cultural de la Franja, reconoixió a l’Academia Aragonesa de la Lengua per la suya fayena en a preservación d'as luengas minorizadas d'Aragón y en a defensa d'o patrimonio lingüistico y cultural, siempre dende la rigurosidat cientifica. Javier Giralt, president de l’Academia, describió las fitas mas importants d'a trachectoria d'a institución, asinas como las principals actividaz que son desenrollando en l'actualidat.
Per atro costau, lo Premio Galan a la normalización cultural y lingüistica 2025 distinguió a l’artista fragatina Lorena Margalló, en reconeiximiento a la suya fayena contina de difusión d'a canción tradicional en a luenga propia y per lo suyo prochecto experimental Foltronik, que fusiona folklore y musica electronica. La mesma Lorena Margalló ufrió una actuación mosical que va meter lo punto final a la veilada.
De seguiu, la secretaria d'o churau d'a XXXVI convocatòria de les Beques d’Investigació IEBC-IEA leyió l'acta formal en que s'atorgaba la beca a lo prochecto El català a l’administració fragatina de l’edat moderna: edició i estudi d’unes actes del consell de Fraga (1501–1504), d'os investigadors Javier Giralt Latorre y Maria Teresa Moret Oliver.
La gala va recordar tamién la figura de Joaquín Salleras (Fraga, 1949 – Barcelona, 2025), mayestro, historiador y doctor en Historia Medieval per la Universidat de Barcelona, estudioso d'a historia de Fraga y la redolada y destacau dinamizador cultural.
Con este premio, l'Academia Aragonesa de la Lengua veye reconoixida la valura d'a suya fayena en favor d'a protección, lo estudio y la promoción d'o patrimonio lingüistico d'Aragón, asinas como la importancia d'a colaboración con as entidaz que treballan per la dignificación y la normalización d'as luengas propias d'o territorio.
