L’Academia Aragonesa de la Lengua encomienza una nueva etapa con a renovación d’a suya Chunta de Gubierno
Lo profesor Javier Giralt ye estau reeslechiu como president d’a institución y la periodista chesa Marta Marín s’incorpora a la Chunta de Gubierno como tresorera. María Teresa Moret y Juan Pablo Martínez ocuparán los cargos de vicepresidenta y secretario.
L'1 d’octubre de 2026 se cumplioron los cinco anyos de l’elección d’a primera Chunta de Gubierno de l’Academia Aragonesa de la Lengua, la institución encargada per lei de veilar per las luengas y modalidaz lingüisticas propias d’Aragón.
Seguntes estableixen los estatutos de l’AAL, cada cinco anyos ye preceptiva la renovación d’a Chunta de Gubierno, por lo que se convocoron las eleccions correspondients a los cargos de president, vicepresident, secretario y tresorero pa lo periodo 2026-2031. Las votacions se celebroron en o Pleno de l’AAL d’o pasau 19 d’octubre y lo resultau estió lo siguient: Javier Giralt Latorre, president; María Teresa Moret Oliver, vicepresidenta; Juan Pablo Martínez Cortés, secretario, y Marta Marín Bráviz, tresorera. Más entabant se renovarán las vocalías, a propuesta de l’Instituto de l’Aragonés y de l’Institut Aragonès del Català.
En o periodo 2021-2026, la Chunta de Gubierno de l’AAL ha meso en marcha la institución y ha establiu las bases d’o suyo funcionamiento y d’a suya actividat academica, a pesar d’as dificultaz que ha habiu d’afrontar. Con esta renovación, s’ubre una nueva etapa ilusionant pa seguir treballando por las luengas y modalidaz lingüisticas d’Aragón, con dos linias esencials que guiarán las actuacions d’a nueva Chunta de Gubierno:
-
Normativización, con especial atención a l’aragonés: ofrir una normativa que sirva como ferramienta de consulta, orientación y seguranza en l’uso d’a luenga, tanto pa los parladors nativos como pa los nuevos aprendices.
-
Normalización u fomento de l’uso social: promover l’uso d’as luengas en o espacio publico, la sociedat y la vida cotidiana pa frenar lo suyo retroceso y afavorir la suya transmisión.
Pa desarrollar estas dos linias, l’Academia emprenderá accions concretas, seguindo lo camín encomenzau en a primera etapa:
- Asesorar y colaborar con administracions, editorials, centros d’estudios locals y atras entidaz publicas y privadas.
- Meter a disposición d’a ciudadanía recursos dichitals actualizaus y d’utilidat practica.
- Difundir lo patrimonio lingüistico, tanto escrito como oral.
- Transferir conoiximientos, textos y recursos útils a la sociedat civil.
- Promover una concepción d’as luengas como realidaz vivas, fértils, propias y compartidas, enradigadas en a historia y la tradición y, de vez, ubiertas a los usos y necesidaz actuals.
- Plazar las luengas como punto d’unión y achirmanamiento pa toda la comunidat.
- Fer valer la trachectoria y los logros consolidaus por la institución dende la suya creación como base pa responder a las necesidaz presents y futuras d’os parladors.
La nueva Chunta de Gubierno de l’Academia Aragonesa de la Lengua (2026-2031)