Es academicos Javier Giralt, Mª Teresa Moret y Juan Pablo Martínez participan en a primera trobada d'os grupos d'acción GALMAr y ICON sobre las luengas minoritarias d’Aragón

L’Academia Aragonesa de la Luenga participó en a chornada «La investigación sobre las lenguas minoritarias de Aragón: proyectos actuales y sinergias futuras», celebrada lo viernes 2 d’octubre en a Facultat de Filosofía y Letras d’a Universidat de Zaragoza. La trobada, organizada por os grupos d’acción de Campus Iberus GALMAr y ICON, en os cuals tamién participa l'Academia como entidat externa, permitió de compartir linias d’investigación sobre l’aragonés y lo catalán en Aragón y explorar futuras accions conchuntas de transferencia y comunicación científica. Entre las intervencions figuroron las d’os academicos Javier Giralt, María Teresa Moret y Juan Pablo Martínez, tamién profesors d’a Universidat de Zaragoza.

Javier Giralt presentó «Toponomasticon Hispaniae: Aragón», an amostró los resultaus d'este prochecto d'investigación toponimica en o territorio aragonés. Por a suya parte, María Teresa Moret intervinió con a charrada «El final d’una llengua administrativa: les darreres actes en català de Fraga (1501-1504)», centrada en o estudio d'as zagueras actas en catalán de Fraga y la fin d’o suyo uso como luenga administrativa. Moret tamién participó, chunto con Iraide Ibarretxe, Andrea Ariño, Alberto Hijazo y Katia Benaiges, en a presentación «Entender el lenguaje desde las lenguas de Aragón: preguntas, datos y métodos del grupo de acción ICON».  Juan Pablo Martínez, director de l’Instituto de l’Aragonés, participó con a charrata «L’aragonés dichital: ferramientas, datos y intelichencia artificial». Esta intervención abordó las tecnolochías lingüisticas aplicadas a l’aragonés y la importancia de disposar de datos y corpus pa desenrollar ferramientas que faciliten l’uso y la transmisión d’a luenga.

Lo programa incluyió amás treballos sobre documentación medieval, toponimia, socialización lingüistica de l’aragonés en Echo y substitución lingüistica en a Francha. La trobada metió en relación lo estudio historico d’as luengas con a suya situación social actual y las posibilidaz d’as ferramientas dichitals, y ubrió un espacio d’intercambio entre investigadors de diferents disciplinas.