Juan Pablo Martínez Cortés

Enchenyero de Telecomunicación y Doctor en Enchenyería Biomedica per la Universidat de Zaragoza. Ye Catedratico de Teoría d'o Sinyal y Comunicacions d'a Universidat de Zaragoza, con acreditación de catedratico, y centra la suya actividat investigadera en o procesamiento de sinyals biomedicos d'orichen cardiovascular pa la millor d'o diagnostico, tratamiento y estratificación d'o risgo en diversas cardiopatías. Ye autor de mas de 60 publicacions JCR (>6400 citas, H=30) y 110 comunicacions en congresos.

En l'ambito d'o estudio y difusión d'a luenga aragonesa, ye miembro d'o Estudio de Filolochía Aragonesa, y ha estau coordinador d'a Gramatica basica de l'aragonés (2021, Prensas de la Universidad de Zaragoza). Ye coautor de treballos sobre la situación de l'aragonés, como Aragonese: The Aragonese language in education in Spain (Fryske Akademy, 2016) u L’aragonés y lo catalán en l’actualidat. Analisi d’o Censo de Población y Viviendas de 2011 (Prensas de la Universidad de Zaragoza, 2017), asinas como d'articlos y ponencias sobre lingüistica aplicada y lo desenrollo de ferramientas informaticas pa l'aragonés.

Miembro de l'A.C. Nogará y cofundador d'iniciativas como Softaragonés y Edicions Transiberiano, ha desenvuelto correctors ortograficos pa l'aragonés, asinas como los traductors automaticos d'Apertium bidireccionals entre castellano-aragonés y aragonés-catalán. Ha treballau en a localización y traducción a l'aragonés de diferents programas informaticos y en atros prochectos pa la ensenyanza, difusión, divulgación y visibilización de l'aragonés. Dende 2019, ye presentador y guionista d'a sección divulgativa "Pizarra y Clarión" d'o programa Charrín Charrán, en Aragón TV.

Juan Pablo Martínez Cortés estió nombrau academico de numero per lo Decreto 122/2021, de 29 de julio, del Gobierno de Aragón, por el que se nombra a los académicos de número de la Academia Aragonesa de la Lengua.