Bienvenius a lo portal de l'Academia Aragonesa de la Lengua, una institución cientifica creada per mandau d'a Lei 3/2013, de 9 de mayo, d'uso, protección y promoción d'as luengas y modalidaz lingüisticas propias d'Aragón (popularment conoixida como Lei de Luengas). Los suyos estatutos s'apreboron en 2018 (Decreto 56/2018 d'o Gubierno d'Aragón), pero los primers quince academicos, propuestos per la Universidat de Zaragoza, las Corz d'Aragón y lo Gubierno d'Aragón, no estioron nombraus dica lo 29 de chuliol de 2021. Lo primero d'octubre d'ixe mesmo anyo se constituyió oficialment lo Pleno d'esta entidat.

Qué sentiu tien la creación d'esta Academia Aragonesa de la Lengua en una comunidat como Aragón? Ye posible muitos desconoixcan que, en esta Comunidat Autonoma, amás d'o castellano (u espanyol), que ye la luenga de toz los aragoneses, i hai atras dos que tamién son propias d'o dito territorio. Son l'aragonés y lo catalán, luengas que s'atestan documentalment en Aragón dende la Edat Meya y que, con penas y treballos, han sobreviviu dica hue.

Ye chustament en este punto an que troba lo suyo pleno sentiu la creación de l'Academia Aragonesa de la Lengua. lo visitant d'este portal l'entenderá a la vista d'as funcions que los suyos propios estatutos determinan, que se pueden sintetizar en dos: establir las normas d'uso correcto de l'aragonés y lo catalán, asinas como veilar per estas dos luengas, defendendo los dreitos lingüisticos d'os suyos parladors, y asesorando a los poders publicos y institucions sobre las mesmas.

Esta institución ye a lo servicio d'a sociedat aragonesa, y no tiene atro obchectivo que lo d'emparar l'aragonés y lo catalán, dos luengas que no se nombran en o Estatuto d'Autonomía d'Aragón, ni sisquiera en a Lei de Luengas, y que  de Lenguas, y que de rapafui se mentan en a Lei d'o Patrimonio Cultural Aragonés. Lo quefer primordial de l'Academia ye, per tanto, fer-las visibles socialment y, a partir d'aquí, protecher este legau d'os nuestros antipasaus, a fin de preservar-lo y transmitir-lo, siempre dende lo rigor cientifico.

Como diz lo Estatuto d'Autonomía d'Aragón, las luengas d'esta tierra suposan una valor social de convivencia y entendimiento. Y este ye, a la finitiva, lo cometiu de l'Academia Aragonesa de la Lengua, una entidat que se plaza a lo mesmo nivel que las decanas Real Academia Galega (1906) y Institut d’Estudis Catalans (1907), u las mas recients, Academia de la Llingua Asturiana (1980), Acadèmia Valenciana de la Llengua (1998) u Institut d’Estudi Aranesi - Acadèmia aranesa dera lengua occitana (2014).

Lo reto de l'Academia Aragonesa de la Lengua ye, agora, dar-se a conoixer, difundir lo suyo treballo y ofrir-lo a toz los aragoneses y, en particular, a aquels que tienen per luenga materna la catalana u l'aragonesa. La Academia naix con potestas, la lechitimidadtque li da la lei, y ha de ganar-se la auctoritas que nomás puet atorgar la sociedat. Este será lo guiache que permitirá que tienga una larga vida y que, con independencia y autonomía, pueda prestar la urchent protección que lo catalán y l'aragonés, como luengas maternas de tantos aragoneses, necesitan hue.