Muere l'academico José Bada Panillo (1929-2026)
L'academico fabarol José Ramón Bada Panillo morió ahiere, 9 de chuliol de 2026. Bada heba estau miembro de l'institución normativa dende la suya creyación, en estar nombrau academico de numero per lo Decreto 122/2021 de 29 de chuliol d'o Gubierno d'Aragón, per lo cual se nombraban los primers academicos de numero de l'Academia Aragonesa de la Lengua. Yera miembro de l'Institut Aragonès del Català.
Sacerdot y Doctor en Teolochía, José Bada tenió una ampla y distinguida carrera tanto en l'ambito academico como en o politico y o social. Estudió en o Seminario de Zaragoza y en a Universidat Pontificia de Salamanca. Se doctoró en Teolochía en a Universidat de Múnich (Alemanya) y amplió los suyos estudios en as universidaz d'Innsbruck (Austria) y Santo Tomás d'Aquino en Roma (Italia). Como docent, exerció la suya profesión en o Seminario de Zaragoza, en a Universidat de Deusto (Bizcaya) y en a Escuela Universitaria de Treballo Social de Zaragoza. Tamién estió l'editor d'a revista Eucaristía.
La suya implicación civica y politica estió fundamental en Aragón. Dende 1982 estió miembro d'o Consello d'Administración d'o periodico El Día. Entre 1983 y 1986, estió lo primer consellero d'Educación y Cultura d'o Gubierno d'a Comunidat Autonoma d'Aragón, presidiu per Santiago Marraco. Tamién estió un estreito colaborador en as actividaz culturals d'o Centro Pignatelli y d'o Seminario d'Investigación pa la Paz de Zaragoza. Autor de cuantos libros sobre sociolochía, politica, etica y teolochía, Bada estió un columnista y colaborador habitual d'a prensa aragonesa.
Bada tamién ha estau una figura clau y compromesa con o patrimonio lingüistico. Como consellero d'Educación y Cultura, consiguió a introducción d'o catalán como materia optativa en as escuelas y institutos de l'aria de parla catalana d'Aragón, y promovió la publicación de libros d'autors aragoneses en catalán y de recursos pa la ensenyanza d'a luenga. Mas enta debant, presidió lo Consello Superior d'as Luengas d'Aragón dende a suya creyación en 2010 dica a suya disolución en 2013. En 2016, en reconoiximiento d'o suyo compromís, recibió lo premio Desideri Lombarte, atorgau per lo Departamento d'Educación, Cultura y Esportes d'o Gubierno d'Aragón, por o suyo treballo incansable en a dignificación y promoción d'o catalán en Aragón.
