L'Academia sinya convenios de colaboración pa promover l'aragonés con a comarca de Sobrarbe y los municipios de l'Aínsa-Sobrarbe y Estadilla.

L'Academia Aragonesa de la Lengua ha aprebau, en os zaguers meses, la firma de convenios de colaboración con diversas entidaz locals aragonesas, con l'obchectivo de fomentar l'uso, la protección y la promoción d'as luengas propias d'Aragón.

En concreto, lo 22 d'aviento de 2025 se formalizó un convenio con a Comarca de Sobrarbe, representada per lo suyo president, Sr. José Manuel Bielsa Manzano, y la vicepresidenta, Sra. Carmen Muro García. L'Academia estió representada per lo suyo president, Javier Giralt Latorre y lo suyo secretario y director de l'Instituto de l’Aragonés, Juan Pablo Martínez Cortés. Posteriorment, la Comisión Mixta se reunió pa planificar actividaz y refirmar esta alianza de colaboración pa promover l'uso, la protección y la promoción de l'aragonés en a dita comarca.

Ixe mesmo día, l'Academia tamién sinyó acuerdos de colaboración con o Concello de l’Aínsa-Sobrarbe, representau per lo suyo alcalde, Sr. Enrique Pueyo García, y con o de Estadilla, representau per l'alcaldesa, Sra. Pilar Lleyda Zanuy, y lo tenient d'alcalde, Sr. Carlos Valbuena Cano. Dimpués d'as firmas se mantenioron reunions de treballo pa definir las actividaz a fer en o marco d'o convenio, con l’obchectivo de visibilizar y promover la luenga aragonesa, con especial atención a las variedaz locals.

L'Academia Aragonesa de la Lengua asesorará a estas institucions, asinas como a totas las que lo soliciten, en materias relacionadas con l'uso correcto de l'aragonés y la suya promoción social. Amás, se podrán fer publicacions conchuntas, programar actividaz y treballar en chunto en a conservación y difusión d'o patrimonio lingüistico.

L'Academia Aragonesa de la Lengua, institución creada per la Lei de Luengas de 2013 y constituyida en 2021, colabora con as institucions que lo solicitan y tien convenios de colaboración con o Chusticia d'Aragón y la Universidat de Zaragoza. Con estes nuevos convenios, la AAL quiere enfortir lo suyo treballo con as entidaz d'o territorio an que las luengas propias conservan mayor vitalidat.