Dimpués de l'aprebación d'a Ortografía de l'aragonés y la suya publicación en o BOA d'o 20 d'abril pasau, lo Plenario d'o Instituto de l'aragonés se va reunir lo pasau 22 de mayo pa planificar y priorizar los siguients treballos a emprender. Lo Plenario decidió d'iniciar en os meses venients lo treballo d'as cinco seccions, encomenzando per las seccions de Gramatica y Lexicografía, encargadas d'elaborar obras que se consideran prioritarias pa la codificación de l'aragonés.

Asinas, lo pasau 6 de chunyo se va celebrar la sesión de constitución d'a Sección de Gramatica, d'a cual fan parte toz los miembros de numero. En ella s'aprebó un plan de treballo cara la elaboración d'una gramatica de l'aragonés y se trió per unanimidat a Juan Pablo Martínez y a Francho Rodés como president y secretario, respectivament, d'a Sección. Dinantes, ixe mesmo día, lo Plenario d'o Instituto eslichió unanimement a lo escritor chistabín José Solana Dueso como nuevo secretario-administrador d'o Instituto de l'Aragonés.