XLIII XORNAES INTERNACIONALES D’ESTUDIU.
O pasau mes de noviembre, os días 3, 4 e 5, se celebró en a ciudat d’Uviéu (Asturias), en o marco incomparable d’o Edificio Historico d’a suya Universidat, a 43a edición d’as Xornaes Internacionales d’Estudiu organizadas por l’Academia de la Llingua Asturiana e dirichidas por Ana María Cano e María del Carmen Muñiz. As tematicas d’as ponencias e as comunicacions presentadas fueron muito variadas, fundamentalment relacionadas con l’asturiano e a suya literatura.
Entre os conferenciants, i estió convidau o president de l’Academia Aragonesa de la Lengua, Javier Giralt Latorre, qui, en una charrada titulada “Afinidades entre la toponimia mayor asturiana y aragonesa”, disertó sobre beluns d’os paralelismos que se pueden establir entre la toponimia d’Asturias e d’Aragón, seguindo a metodolochía comparativa que s’emplega en o prochecto coordinau Toponomasticon Hispaniae (https://toponhisp.org/). Difuera d’o programa academico, estió una buena ocasión pa saludar a o president de l’Academia de la Llingua Asturiana, Sr. Xosé Antón González Riaño, e de meter en común belunas d’as analochías que, dillá d’a toponimia, tienen as dos comunidaz autonomas y, de comenzar a ubrir vías de colaboración entre as dos institucions.
XXV JORNADAS LITERARIAS. LA FUNCIÓN SOCIAL DE LA LITERATURA.
En ixa mesma semana, d’o 7 a o 10 de noviembre, se celebroron en Uviéu e Pravia as XXV Jornadas Literarias organizadas por l’Asociación de Escritores y Escritoras de Asturias, presidida por Mª Esther García López, con o lema “La función social de la literatura”.
La escritora e vicepresidenta de l’Academia, María Pilar Benítez Marco, participó en a mesa redonda “La función social d’a literatura en as luengas minorizadas”, moderada por o profesor d’a Universidat d’Uviéu Gonzalo Llamedo, con a ponencia “La literatura en aragonés. Algunos ejemplos de su función social a través del tiempo”. Participoron en a mesma mesa atros escritors e escritoras en luengas minorizadas: Miren Billelabeitia (basco), Fran Alonso (gallego), Josep Ballester (valenciano) i Marta Mori de Arriba (asturiano). Asina mesmo, María Pilar Benítez intervenió en o recital de poesía e mosica que tenió lugar en ditas chornadas, que destacoron por a suya buena organización, por o interés d’as conferencias, d’as mesas redondas e d’as actividaz desarrolladas, e por l’ambiente de cordialidat e aprecio a as lenguas e a as suyas literaturas.
Javier Giralt en as Xornaes Internacionales d'Estudiu
María Pilar Benítez en as XXV Chornadas Literarias.