Solemne acto de presa de posesión d'o director de l'Instituto de l'Aragonés y presentación d'a Ortografía de l'aragonés.

En o suyo discurso de salutación, lo nuevo director de l'Instituto de l’Aragonés remeró lo papel crucial que heba teniu Ánchel Conte como director de l'Instituto y expresó la gratitut per la confianza atorgada per los suyos companyers y companyeras pa continar con esta fayena, y asumió con responsabilidat los compromisos expresaus per lo suyo predecesor.

Lo director subrayó las funcions normativas y d'asesoramiento de l'Academia Aragonesa d'a Luenga y, per tanto, de l'Instituto de l’Aragonés, establidas per la Lei 3/2013. Resaltó la importancia d'a colaboración con as institucions publicas y la ciudadanía pa preservar y promover lo patrimonio lingüistico aragonés. En este sentiu, ufrió l'emparo y orientación de l'Academia y los suyos institutos en cualsequier actividat relacionada con as luengas y modalidaz lingüisticas, asinas como en a promoción social d'as mesmas y destacó la necesidat d'un contacto fluyiu y de colaboración con asociacions culturals y d'estudio de l'aragonés. Dimpués d’explicar los prochectos en marcha, querió dar la bienvenida a los nuevos academicos: la periodista chesa Marta Marín Bráviz y lo profesor londinés Brian Mott.

Juan Pablo Martínez va demandar a los poders publicos aragoneses que implementen politicas que emparen y fomenten l'uso d'as luengas propias, incluyindo la suya ensenyanza, uso en l'administración y medios de comunicación, y la promoción d'a suya valura cultural y social. Amás, va exhortar a institucions y partius politicos a privar la confrontación y a treballar en acuerdos amplos y estables que respeten y promuevan lo patrimonio lingüistico, con l'emparo de l'Academia como entidat cientifica independient.

Contino, Javier Giralt valoró la importancia que tiene pa l'aragonés l'aprebación d'a suya norma ortografica oficial, y destacó lo buen treballo feito per l'Instituto de l'Aragonés baixo la dirección d'Ánchel Conte, a qui ye dedicada la publicación. Lo president de l'Academia sinyaló que con l'aprebación d'una ortografía oficial, se mete fin a un periodo en que conviviban propuestas ortograficas fomentadas per distintas asociacions, y se tien una ortografía de referencia pa las institucions y pa toz los usuarios d'a luenga. Contino, Juan Pablo Martínez avantó la fayena d'Ánchel como president d'a comisión de grafía de l'instituto y, evocando la ilusión que este hese teniu per estar en a presentación d'a Ortografía, procedió a leyer lo prologo que Ánchel deixó pa la publicación.

Pa rematar los parlamentos, lo vicerrector Francisco Beltrán querió meter en valor la riqueza que suposa lo multilingüismo pus, historicament, lo monolingüismo ha estau siempre la excepción, y no pas la regla. Manifestó tamién que, pa la supervivencia d'una luenga como l'aragonés, cal treballar en a suya normativización, como ye fendo l'Academia, y replegó la propuesta realizada per lo director de l'Instituto de l’Aragonés cuanto a la colaboración entre l'Academia y las institucions aragonesas.

L'acto remató d'una manera muito emotiva, con a prochección d'un video con poemas d'Ánchel Conte cantaus per Elena Martínez, perteneixients a lo suyo disco "Zarré os uellos", y poemas leyius per Lucía López Marco, ganadora d'o zaguer Premio Arnal Cavero y cocreadora, chunto a Alberto Gracia Trell, d'o grupo de Facebook "Queremos más obras d'Ánchel Conte".