Reunión de l'Academia Aragonesa de la Lengua con o Chusticia d'Aragón
Lo president y lo secretario de l’Academia mantenioron una reunión lo viernes 7 de chuliol en o Palacio d’Armijo, siede d’o Chusticia d’Aragón, con Javier Hernández, lo Lugartenient d’o Chusticia -en funcions de Chusticia dimpués d’a renuncia d’o Chusticia Ángel Dolado-, y con Mª Jesús Cruz, l’asesora en l’Aria d’Educación, Universidat, Cultura y Patrimonio.
En a reunión se va presentar l’AAL debant d’o Chusticiau, asinas como lo suyo funcionamiento y l’actividat feita dica agora. Como institución sozmesa a la supervisión d’o Chusticia, se va determinar de mantener una comunicación fluyida pa donar respuesta a las posibles inquietuz y dudas planteyadas per la ciudadanía y/u atras institucions a traviés d’o Chusticia. L’Academia ufrió tamién a lo Chusticia l’asesoramiento que, seguntes los suyos estatutos, ha de prestar a los poders publicos y institucions sobre temas relacionaus con l’uso correcto d’as luengas y las modalidaz lingüisticas propias y con a suya promoción social. En a reunión tamién s’identificoron ambitos y materia pa la futura colaboración entre las dos institucions.
Como primer paso d’esta colaboración, y a demanda d’o Chusticia, s’han revisau las versions en aragonés y en catalán d’a web d’o Chusticia, y s’ha adaptau la primera a la ortografía normativa de l’aragonés en cumplimiento de l’articlo 8 d’a Lei 3/2013.
Palacio d'Armijo, la siede d'o Chusticia d'Aragón