L'Acadèmia ye present en a celebración d'o Día Europeu d'as Luengas en o Congreso d'os Deputaus
Lo Congreso d'os Deputaus, en colaboración con o Ministerio de Cultura d'o Gubierno d'Espanya van commemorar lo pasau chueves 26 de setiembre lo Día Europeu d'as Luengas con un acto de reconoixencia a lo plurilingüismo en Espanya en que participoron representants de totas las academias d'as luengas oficials y estatutarias.
La presidenta d'o Congreso, Francina Armengol, ubrió l'acto fendo referencia a que "bellas sixanta luengas rechionals son charradas cutianament per alredol de 46 millons d'europeus y europeas. Manimenos, hue muitas son en periglo d'extinción. En cualques puestos, se ye perdendo l'uso d’as luengas, sobre tot entre los ninos y los chóvens. Se pierde alavez la transmisión cheneracional, bella cosa d'una valura incalculable pa las sociedaz”. En l'acto va prener la parola tamién lo ministro de Cultura, Ernest Urtasun, qui va destacar que "cuan que una luenga caye en desuso, lo que ye en periglo ye una traza de mirar-se lo mundo. Cuanto mas plural ye una sociedat, mas libre ye la suya ciudadanía".
Contino, Rozalén, acompanyada per lo suyo guitarrista y la interprete de luenga de cenyos, ha interpretau cuatro temas, en castellano, gallego, catalán y basco.
Dimpués de l'actuación musical, encomenzó la mesa redonda, amoderada per la periodista Nerea Sarriegi, y en a cual participoron Carme Riera, vicedirectora d'a Real Academia Española; Teresa Cabré, presidenta d’o Institut d’Estudis Catalans; Andrés Urrutia, president d'Euskaltzaindia; Víctor Fernández, president d'a Real Academia Galega; Jèp de Montoya, president d'o Institut d'Estudis Aranesos - Acadèmia Aranesa d'a Llengua Occitana; Javier Giralt, president de l'Academia Aragonesa d'a Luenga; Joan Rafael Ramos, vicepresidente de l’Acadèmia Valenciana d'a Llengua; Xosé Ramón Iglesias, secretario de l'Academia d'a Llingua Asturiana, y Jaume Carot, rector d'a Universidat d’as Islas Balears.
En a suya intervención, Javier Giralt fació referencia a la particularidat d'a AAL, ya que ye una academia responsable de las dos luengas propias d'Aragón, l'aragonés y lo catalán. Lo president se refirió a la falta de reconoixencia legal y a la poca predisposición d'os diferents gubiernos enta la protección y la promoción d'as luengas. Explicó lo treballo de l'Academia en os suyos tres anyos d'existencia, destacando la elaboración y aprebación d'a Ortografía de l'aragonés, norma ortografica oficial d'este idioma y primer paso en a suya normativización, y l'acuerdo pa la reconoixencia d'a normativa d'o Institut d’Estudis Catalans y la Acadèmia Valenciana d'a Llengua en o caso d'o catalán.
