Ánchel Conte Cazcarro (†)

Licenciau en Filosofía y Letras, Doctor en Cheografía e Historia per a Universidat de Barcelona, estió Catedratico d'Instituto dica a suya retreta. Como historiador publicó La Encomienda del Temple de Huesca, La aljama de moros de Huesca, Los moriscos de la ciudad de Huesca, una convivencia rota; La aljama de moros de Barbastro, Los moros de la comarca de Barbastro y Tierras del Cinca, amés de numbrosos articlos e comunicacions siempre sobre temas altoaragoneses en aragonés e castellano. Coautor de El aragonés, identidad y problemática de una lengua (1982). En 1968 publica o cuento Yaya Andresa, a primera obra en aragonés común. Gana en ixa epoca cuatre premios en a Fiesta d'a Poesía de Uesca, dos per poemas en aragonés, uno en castellano e per o treballo d'investigación en aragonés “O Temple en a ciudá de Uesca” (toz ineditos).

Entre a suya producción literaria en aragonés destacan libros de poesía como: No deixez morir a mía voz (1972, reeditada en 1986, 2002 y 2016), O tiempo y os días (1996), E zaga o mar o desierto (2002), Luna que no ye luna (2014) y Digo sinse dicir (2017), e de prosa como: O rafe d’o espiello (1997), O bolito d’as sisellas (2000), De ordo sacerdotalis (2004) y Aguardando lo zierzo (2002, reeditada en 2022). Belunas d'as suyas obras han estau traducidas a o ruso, a o castellano, a o francés, a o euskera y a l'asturiano. Cuenta amés con poemas e cuentos publicaus en revistas e obras colectivas. Recibió cuantos premios literarios e distincions, incluyindo a Medalla a o Merito Cultural d'o Gubierno d'Aragón, en 2009.

Ánchel Conte Cazcarro estió nombrau academico de numero per lo Decreto 122/2021, de 29 de julio, del Gobierno de Aragón, por el que se nombra a los académicos de número de la Academia Aragonesa de la Lengua. Estió o primer director d'o Instituto de l'Aragonés y president d'a Comisión de Grafía d'o Instituto de l'Aragonés. Pasó abant lo 22 de noviembre de 2023.